#مانگی ڕه‌مه‌زانی پیرۆز

مەسرور بارزانی: پەکەکە سودی لە نیاز پاکییەکانی هەرێم وەرگرتووە و هۆکاری توڕەکردنی ئەنقەرەیه‌

هەواڵی / 27/2/2021 138 جار بینراوە

ناوچەی نیشتوجێبونی داگیرکردووە
مەسرور بارزانی: پەکەکە سودی لە نیاز پاکییەکانی حکومەتی هەرێم وەرگرتووە و هۆکاری توڕەکردنی ئەنقەرەیه‌

شه‌ن پرێس:
سەرۆکی حکومەتی هەرێم رایگەیاند، "پەکەکە لە هاتنی سوپای تورکیا بۆ هەرێم بەرپرسیارە و بووەتە هۆکاری توڕەکردنی ئەنقەرە"، دەشڵێت، "پەکەکە سودی لە نیاز پاکییەکانی حکومەتی هەرێم وەرگرتووە."

مەسرور بارزانی سەرۆکی حکومەتی هەرێم لە چاوپێکەوتنێکیدا لەگەڵ ئاژانسی فرانس ٢٤دا رایگەیاندووە، "کێشەی پەکەکە پەیوەندی بە ئێمەوە نییە و چەند ساڵێکە بۆ ئێمە گواستراوەتەوە."

ئەوەشی خستووەتەڕوو، پەکەکە لە هاتنی سوپای تورکیا بۆ هەرێم بەرپرسیارە و بووەتە هۆکاری توڕەکردنی ئەنقەرە و دەیانەوێت تۆڵەبکەنەوە، دەشڵێت "پەکەکە سودی لە نیاز پاکییەکانی حکومەتی هەرێم وەرگرتووە."

مەسرور بارزانی باسی لەوەشکردووە، پەکەکە شاخ و ناوچەی نیشتوجێبونی داگیرکردووە و بەهۆی ئەوەشەوە نەمانتوانیوە زیاتر لە ٨٠٠ گوند بنیات بنێینەوە.

ئاماژەی بەوەشکردووە، "هیوادارین پەکەکە درک بەوەبکات بوونی سەربازی ئەوان لە هەرێمی کوردستاندا خزمەت بە کەس ناکات." 

سەرۆکی حکومەتی هەرێم دەشڵێت، "پێویسته‌ چاره‌سه‌رێكی ئاشتییانه‌ بۆ ئه‌و كێشه‌یه‌ بدۆزرێته‌وه‌."

لە وەڵامی پرسیاری، "ئایا ئێوە رازی دەبن بە بوونی هێزی سەربازی تورکیا لە ناوچەکانتان، یاخود نەخێر؟"، مەسرور بارزانی رایگەیاند، "ئێمە بە تەواوی لەگەڵ سەروەری وڵاتەکەمانداین و هیچ وڵاتێکی لەگەڵ ئەوەدانییە سوپای وڵاتێکی سەروەرییەکەی پێشێل بکات و لە ئێستادا تورکیا هیچ بەهانەیەکی نییە ناوچەی ئارام لە هەرێمی کوردستاندا دروستبکات، بەڵام پەکەکە بەهانە دەدات بە تورکیا."

لە ماوەی رابردوودا، چەندین جار تورکیا هێرشی کردووەتە سەر هەرێمی کوردستان و بیانوی تورکیا لەم کارەشی بوونی هێزەکانی پەکەکەیە لەو ناوچانەدا، پێشتریش، رەجەب تەیب ئەردۆغان سەرۆککۆماری تورکیا رایگەیاندبوو، "شەوێک بە بێدەنگی دێینە شنگال."

هاوکات، لە رۆژی ١٠ی ئەم مانگە، وەزارەتی بەرگری تورکیا، یەکەم رۆژی ‏دەستپێکردنی ئۆپراسیۆنی چنگی هەڵۆی ٢ی لە چیای گارە لە هەرێمی کوردستان راگەیاند، ‏کە تیایدا فڕۆکەی جەنگی و هەلیکۆپتەر و هێزێکی سەربازی، کە پێکهاتبوو لە دوو ‏هەزار و ٢٠٠ سەرباز و رۆژی ١٤ی مانگیش، تورکیا کۆتاییهاتنی ئۆپراسیۆنەکەی راگەیاند.

زۆرترین بینراو