هۆکارەکانی سەر سووڕان و چاره‌سه‌ره‌كه‌ی بزانه‌

هەواڵی / 30/10/2020 216 جار بینراوە

هۆکارەکانی سەر سووڕان و چاره‌سه‌ره‌كه‌ی بزانه‌

د.صلاح عبدالواحد سلیمان - پسپۆڕی نەشتەرگەری قووڕگ و لووت و گوێ

سەرسووڕان هۆکاری زۆرە، بەڵام ئەوانە باس دەکەین کە پەیوەندی بە پسپۆڕی قووڕگ و لووت و گوێ هەیە.
✔ سەرسووڕانی جێگۆڕکی:
نەخۆش هەست بە سەرسووڕان دەکات و هێڵنج یان ڕشانەوە، ماوەکەی زۆر کورتە تەنها چەند چرکەیەکە، بەڵام لەوانەیە ئەوەندە تووند بیگرێت نەخۆش نەزانێت چەندە تووشی سەرسووڕان بووە. نەخۆش زۆر جار لە ماوەی ساڵێك چەند جار دووبارە تووش دەبێتەوە.
ئەو جۆرە سەرسووڕانە لەخۆیەوە دروست نابێت بەڵکو ئەو کاتە دروست دەبێت کە نەخۆش سەری دەجوولێنێت بۆ لایەك یان بۆ خوارەوە یان سەرەوە، یان کاتێك پاڵدەکەوێت یان دەیەوێت خۆی بسوڕێنێت لەکاتی پاڵدانەوەی لەناو جێگادا.
هۆکارەکەی هەوکردنی گوێ ی ناوەڕاست نیە بەڵکو هۆکارەکەی بریتیە لە ناتەواوی یەك تووشی ناوەندی کۆنتڕۆڵکردنی هاوسەنگی دەبێت لە گوێ ی ناوەوە.
هەندی چار لە دوای بەرکەوتنی سەر بە زەبرێکی دەرەکی دروست دەبێت کە زۆربەی کات هەردوولای گوێ یەکانی دەگرێتەوە.
دەست نیشانکردنی بەهۆی نیشانەکانی دەبێت، پێویستی بە پشکنینی تاقیگەیی و تیشك نیە.
چارەسەرەکەی پێویستی بە دەرمانی دژە سەرسووڕان نیە، بە ئەنجامدانی جۆرە جوولەیەکی تایبەت لە لایەن پزیشکەوە بۆ نەخۆش ئەنجام دەدرێت کە ناودەبرێت بە جوولەی ئیپلی.
ئەو جۆرە جوولەیە لە چەند هەنگاوێکی کورت پێك دێت کە لە نۆرینگە ئەنجام دەدرێت بۆ نەخۆش، ڕێژەی سەرکەوتنی گەلێك بەرزە. دەگمەن نەخۆش پێویستی بە دووبارەبوونەوە دەبێت.
++++++++++++++++++
✔ نەخۆشی مینیەر:
نەخۆشی مینیەر بۆ زیاتر لە جارێك تووشی سەرسووڕان دەبێت و دەڕشێتەوە، کە چەند کاتژمێرێك دەخایەنێت، دوایی نەخۆش ووردە ووردە هەست بە باش بوون دەکات، زۆر بە تووندی تووشی دەبێت، لە خۆیەوە دروست دەبێت.
ئەو کەسانەی ئەو نەخۆشیەیان هەیە، لە هەمان کاتی هەست بە لاوازی بیستن دەکەن لەگەڵ ناڕەحەتی و ئازار لە گوێدا لەگەڵ دروست بوونی دەنگە دەنگ. ئەو کێشانە لە یەك گوێ ڕوودەدات، بەڵام لەوانەیە ئەگەر چارە نەکرێت هەردوو گوێ یەکانی بگرێتەوە.
چارەسەرەکەی بە دەرمان دەکرێت، دەگمەن پێویستی بە نەشتەرگەری دەبێت.
+++++++++++++++++++
✔ هەوکردنی دەماری هەشتەمی مێشك:
ئەو دەمارە بەرپرسیارە لە ڕاگرتنی هاوسەنگی لەش و بیستن، بە هۆی ڤایرۆسەوە تووشی هەوکردن دەبێت، نەخۆشەکە لە ناکاو تووشی سەرسووڕان دەبێت و ڕشانەوەی لەگەڵ دادەبێت کە ماوەی چەند ڕۆژێك دەخایەنێت.
نیشانەکانی ئەو جۆرە هەوکردنە زۆر بە جەڵتەی مێشك دەچێت، بۆیە زۆر گرنگە لە یەکتری جیاواز بکرێنەوە.
دەستنیشانکردنی بە نیشانەکانی دەبێت، دەگمەن پێویستیمان بە تیشك و پشکنینی خوێن دەبێت.
چارەسەرەکەی برتیە لە چەند جۆرە دەرمانێك بۆ ڕاگرتنی سەرسووڕان و ڕشانەوە لەگەڵ وەستاندنی هەوکردنەکە.
++++++++++++++++++
ℹ هەندی هۆکاری تر هەن وەکو بوونی واکس لە ناو گوێ ی دەرەوە کە دەبنە هۆی لاوازی بیستن، بە تایبەت لەوانەی زۆر دەستکاری گوێ یان دەکەن یان ئەو کەسانەی کە بە تەمەنن. هەروەها ئەو کەسانەی کە بۆ ماوەیەکی دوور و درێژ هەوکردنی گوێ ی ناوەڕاستیان هەبووە. یان هەوکردنی لەناکاوی گوێی ناوەیان هەبووە.

زۆرترین بینراو