#ڤایرۆسی کۆرۆنا

عەبدولستار مەجید: داهاتمان هەبووە و نەوتمان فرۆشتوە و بودجە لە عێراق هاتوە بۆچی ٢٧ ملیار دۆلار قەرزارین؟

هەواڵی / 3/6/2020 146 جار بینراوە

ئەم قەرزانە چۆن وەرگیراوە؟
عەبدولستار مەجید: داهاتمان هەبووە و نەوتمان فرۆشتوە و بودجە لە عێراق هاتوە بۆچی ٢٧ ملیار دۆلار قەرزارین؟

شه‌ن پرێس:
ژمارەیەک پەرلەمانتار داوای بانگهێشتکردنی سەرۆکی حکوومەتی هەرێمی کوردستان و جێگرەکەی و وەزیری دارایی دەکەن بۆ روونکردنەوەی ئەو ٢٧ ملیار دۆلارەی کە قەرزە  لەسەر هەرێمی کوردستان.

سەرۆکی فراکسیۆنی کۆمەڵی ئیسلامی لە پەرلەمانی کوردستان، عەبدولستار مەجید ده‌ڵێت: "١٧ پەرلەمانتار واژوومان کردووە بۆ ئەنجامدانی دانیشتنی ئاسایی و بانگهێشتکردنی سەرۆکی حکوومەتی هەرێمی کوردستان، مەسرور بارزانی و جێگری سەرۆکی حکوومەت، قوباد تاڵەبانی و وەزیری دارایی، ئاوات جەناب نوری بۆ روونکردنەوە لەسەر ئەو ٢٧ ملیار دۆلارەی کە حکوومەت قەرزارە" ده‌شڵێت "دەمانەوێت پرسیار بکەین کە ئەم قەرزانە چۆن وەرگیراوە و لە کێ وەرگیراوە و بۆ چ مەبەستێک وەرگیراوە و چۆن خەرجکراوە".

سەرۆکی فراکسیۆنی کۆمەڵی ئیسلامی لە پەرلەمانی کوردستان، عەبدولستار مەجید روونیده‌كاته‌وه‌ "بەپێی بڕگەی یەک لە ماددەی ٦٦ی پەیڕەوی ناوخۆی پەرلەمانی کوردستان کە پێویستی بە واژووی ١٠ پەرلەمانتار هەیە، ئێمە ١٧ پەرلەمانتار واژوومان کردووە لەسەر ئەنجامدانی دانیشتنی پەرلەمان و بانگهێشتکردنی سەرۆکی حکوومەتی هەرێمی کوردستان و جێگرەکەی و وەزیری دارایی کە ئەوانە بەرپرسن لە بابەتی ٢٧ ملیار دۆلار قەرزەکەی سەر هەرێمی کوردستان، ئەم بابەتە کە لە رۆژی پێش جەژن لەلایەن سەرۆکی حکوومەت باسکرا بەڕاستی بابەتێکی نائارامە و دەروونی هاووڵاتییانی تێکداوە، بۆیە پێمان باشە ئەم بابەتە بۆ پەرلەمان روون بکرێتەوە و پەرلەمانتارانیش زیاتر داوای روونکردنەوە بکەن".

عەبدولستار مەجید وتیشی: "ئێمە داهاتی ناوخۆمان هەبووە، نەوتمان فرۆشتووە، جار جارەش بڕە بوودجەیەک لە عێراق هاتووە، بۆچی دەبێت ٢٧ ملیار دۆلار قەرزاربین لە کوێ قەرزکراوە، بۆچی قەرزکراوە، کوا بەڵگەی قەرزکردنەکە بە نووسراو، دەسەڵات بە کێ دراوە ئەم قەرزانە بکات، چونکە ئێستا عێراق دەیەوێت قەرز لە دەرەوە بکات و خەریکی رێکارە یاساییەکانە".

زۆرترین بینراو