لەناو توشبووانى عێراق بە كۆرۆنا بارودۆخى کەسانی جگەرەکێش خراپترینە

هەواڵی / 28/3/2020 184 جار بینراوە

لەناو توشبووانى عێراق بە كۆرۆنا بارودۆخى کەسانی جگەرەکێش خراپترینە

 


 بەڕێوەبەرى تەندروستى كەرخ/ بەغدا دەڵێت، لەناو توشبوانى ڤايرۆسى كۆرۆنا لە عێراق لاوازترين چين بۆ ڕوبەڕوبونەوەى ڤايرۆسەكە ئەوانەن كە جگەرەكێشن.

نازك فەتلاوى،  بەڕێوەبەرى تەندروستى كەرخ/ بەغدا لەلێدوانێكدا بە پێگەى بغداد اليومى وتووە، ئەوانەى كە جگەرەكێشن لاوازترين چينن بۆ ڕوبەڕوبونەوەى ڤايرۆسەكە كاتێك تووش دەبن، بۆيە پێويستە لەم ماوەيەدا هاووڵاتيان واز لە جگەرەكێشان بهێنن، ئەوەش لەپێناو بەهێزكردنى سيستمى بەرگریى لەشيان.

ئاماژەى بەوەشداوە، جگەرە كێشان مەترسيەكان زياد دەكات و سيستمى بەرگریى جەستەى مرۆڤ لاواز دەكات، بۆيە ئەوەش مرۆڤ توشى مەترسى دەكاتەوە كاتێك بەرگرى دژى ڤايرۆسى كۆرۆناى نوێ COVID-19 دەكات.

بەپێى دواين ئامار، ژمارەى توشبوانى ڤايرۆسى كۆرۆنا لە عێراق (بە هەرێمى كوردستانيشەوە) گەيشتوەتە 526 توشبوو و 44 لەو توشبوانەش گيانيان لەدەستداوە.

لەلايەكى ترەوە، عەدنان نوار، ئەندامى ڕێكخراوى تەندروستیى جيهانى ئاماژەى بەوەداوە، پێويستە بارودۆخەكە پشتگوێ نەخرێت، ئەوەش لەپێناو تێپەڕاندنى قەيرانى كۆرۆنا بە كەمترين زيان و پێشیوايە كە ناوەڕاستى مانگى داهاتوو يەكلاكەرەوە دەبێت بۆ ئەوەى قەبارەى ئەو مەترسيە بزانرێت كە ڤايرۆسەكە لەسەر عێراق دروستى كردوە.

ڕونيشيكردوەتەوە، ڕێكخراوى تەندروستیى جيهانى عێراقى خستوەتە خانەى مەترسيیەوە، بۆيە هەمووان چاوەڕێى ئەوەن بزانن بارودۆخەكە چى بەسەر دێت بۆ ئەوەى هەڵوێستى خۆيان ڕابگەيەنن و دڵنيايى بدەنە عێراق.


زۆرترین بینراو