#ڤایرۆسی کۆرۆنا

ئاسایشی هەولێر: مەحمود سەنگاوی قاچاخچییەکی ناسراوی گه‌رمیانه‌ ‌و تێوەگلاوه‌ له‌ بازرگانی ڕەش و ناشەرعی

هەواڵی / 20/1/2020 536 جار بینراوە

سەنگاوی ناماقوڵی دەکات
پێشتر مەحمود سەنگاوی ئاسایشی پارتی بە “داعش و تیرۆرست” ناوبردبوو
ئاسایشی هەولێر: مەحمود سەنگاوی قاچاخچییەکی ناسراوه‌و‌ تێوەگلاوی بازرگانی ڕەش و ناشەرعییە

شه‌ن پرێس:
بەڕێوەبەرایەتی گشتی ئاسایشی هەولێر لەرونکردنەوەیەکدا سەبارەت بەرەخنەگرتنی مەحمود سەنگاوی لەچۆنیەتی گیان لەدەستدانی ئەندامێکی دەستگیرکراوی یەکێتی لەهەولێر، دەڵێت "جگەی سەرسوڕمان نییە قاچاخچییەکی ناسراوی مەرزەکانی ناوچەی گەرمیان، کە تێوەگلاوی بازرگانی ڕەش و ئەندامی تۆڕی بازرگانی ناشەرعییە، بەرگری لە تۆری مافیا بکات و لەسەریان بێتە دەنگ و وەرەقەکان تێکەڵی پەیوەندی نێوان حیزبەکان بکات".

بەڕێوەبەرایەتی ئاسایشی گشتی هەولێر، ئەمڕۆ دوشەممە، لە راگەیەندراوێكدا رایگەیاند"چەند رۆژێک بەر لە ئێستا، محمود سەنگاوی بە شێوەیەکی ناڕەوا و بە ئاستێکی نزمی وەک خۆی پەلاماری هێزەکانی ئاسایشی دا و ناماقوڵی زۆری دەرهەق بە دڵسۆزان و رۆڵەکانی ئەم گەلە و دامەزراوە فەرمییەکانی هەرێمی کوردستانی کردوە."

ئاسایشی هەولێر وتوشیەتی"جێگەی سەرسوڕمان نییە قاچاخچییەکی ناسراوی مەرزەکانی ناوچەی گەرمیان، کە تێوەگڵاوی بازرگانی ڕەش و ئەندامی تۆڕی بازرگانی ناشەرعییە، بەرگری لە تۆڕی مافیا بکات و لەسەریان بێتە دەنگ و وەرەقەکان تێکەڵی پەیوەندی نێوان حیزبەکان بکات."

جەختیشی كردۆتەوە كە "دەزگاکەمان بەمافی خۆی دەزانێت لە دژی هەر جۆرە تۆمەتێکی ناڕەوا و ناوزڕاندنێک، بەرامبەر دەزگا و هێزەکانمان، رێکاری یاسایی بگرێتەبەر."

رۆژی پێنجشه‌ممه‌ هه‌واڵی گیانله‌ده‌ستدانی مەجید ئیبراهیم راگه‌یه‌ندرا كە پێشمەرگەیه‌كی تەمەن 38 ساڵی یەكێتی بو له‌ لیوای 3ی تایبه‌تی هێزی پێشمه‌رگه‌، وه‌ك ده‌وترێت پێشتر ئه‌و پێشمه‌رگه‌یه‌ لەگوندی سیساوە لەلایەن دژە تیرۆری پارتییەوە رفێندراوه‌.

له‌سه‌ر گیانله‌ده‌ستدانی ئه‌و پێشمه‌رگه‌یه‌ ئاسایشی هەولێر ڕاگەیه‌ندراوێکی بڵاوکردەوە و ئاماژه‌ی به‌وه‌داوه‌ كه‌ ده‌ستگیركردنی ئه‌و پێشمه‌رگه‌یه‌ی یه‌كێتی په‌یوه‌ندیی به‌ مادده‌ی هۆشبه‌ره‌وه‌ هه‌یه‌و لەزینداندا خۆی خنكاندوە.

دوای راگه‌یه‌ندراوه‌كه‌ی ئاسایشی هه‌ولێر حاجی مەسیفی، ئەندامی ئەنجومەنی گشتی سەركردایەتی یەكێتیی نیشتمانی كوردستان لەبەردەم پزیشكی دادوەری ھەولێر بەرۆژنامەنوسانی راگەیاند، "گومانمان لەروداوەكە ھەیە كە ئەو پێشمەرگەیە لەزیندانی ئاسایشی ھەولێر خۆی خۆی خنكاندبێت ئەو راپۆرتە پزیشكیەمان رەتكردوەتەوە و سكاڵای یاسایش تۆمار دەكەین."

جێگه‌ی ئاماژه‌یه‌ پێشتر مەحمود سەنگاوی، ئه‌ندامی ئه‌نجومه‌نی گشتی سه‌ركردایه‌تی یه‌كێتی رۆژی 18ی ئه‌م مانگه‌  لە مەراسیمی چلەی شەهیدانی كوڵەجۆ، لە بەشێكی قسەكانیدا لەسەر گیانلەدەستدانی پێشمەرگەیەكی حزبەكەی لەزیندان لەهەولێر، ئاسایشی هەولێری تۆمەتبار كرد بەوەی خۆیان ئەو پێشمەرگەیەیان خنكاندوەو كارەكەشی بە "كردەوەیەكی تیرۆرستی" ناوبرد و وتی"ئەوانەی وایان لەو پێشمەرگەی یەكێتی كرد هیچیان كەمتر نییە لەوەی داعش كردویەتی، چونكه‌ داعش پێشمەرگەكانمان شەهید دەكات و پارتیش پێشمەرگەمان دەخنكێنێت".

سەنگاوی وتیشی"رەفتارەكانی پارتی بەرامبەر بە لایەنگرانی یەكێتی هەمان رەفتارەكانی حزبی بەعسە."

دەقی راگەیەندراوەكەی ئاسایشی هەولێر..

"وەڵامێکی پێویست بۆ (محموود سەنگاوی) لە بەڕێوەبەرایەتی گشتی ئاسایش- هەولێرەوە


چەند رۆژێک بەر لە ئێستا، محموود سەنگاوی بە شێوەیەکی ناڕەوا و بە ئاستێکی نزمی وەک خۆی پەلاماری هێزەکانی ئاسایشی دا و ناماقوڵی زۆری دەرهەق بە دڵسۆزان و رۆڵەکانی ئەم گەلە و دامەزراوە فەرمییەکانی هەرێمی کوردستانی کردووە. ئەو وتانەی محموود سەنگاوی پەیوەندیدارە بە دۆسیەی تۆمەتبارێک کە لەسەر مامەڵەکردن بە شەست کیلۆگرام ماددەی هۆشبەر دەستگیر کرابوو و لە بەندیخانە کۆتایی بە ژیانی خۆی هێنابوو.

ئێمە تێگەیشتنمان هەیە بۆ هەست و سۆزی کەسوکار و لایەنگرانی ئەو کەسە کە تێوە گلاوە بە بازرگانی کردن بە ماددەی هۆشبەر و دەرگامان کراوەتەوە بۆ هەر جۆرە لێکۆڵینەوەیەک کە گومانەکان بڕەوێنێتەوە و لێکۆڵینەوەکان لەو بارەیەوە لەگەڵ لایەنە فەرمیە پەیوەندیدارەکان بەردەوامە.

ئاشکراکردنی ئەم گروپە تاوانبارە، دەستکەوتی گەورەیە بۆ پرۆسەی گەڕان و ئاشکراکردنی ئەو گروپە مافیاییەی دەیانەویت هەرێمی کوردستان بکەنە ناوەندی بازرگانی کردن و ئالودەکردنی هاووڵاتیان بە ماددەی نەگریسی هۆشبەر. دەزانین قاچاخچێتی لە ناو پشێویدا چالاك دەبێت، بۆیە جێگەی سەرسوڕمان نییە قاچاخچییەکی ناسراوی مەرزەکانی ناوچەی گەرمیان، کە تێوەگلاوی بازرگانی ڕەش و ئەندامی تۆڕی بازرگانی ناشەرعییە، بەرگری لە تۆری مافیا بکات و لەسەریان بێتە دەنگ و وەرەقەکان تێکەڵی پەیوەندی نێوان حیزبەکان بکات.

دەزگای ئاسایشی هەرێمی کوردستان پێکهاتووە لە ڕۆڵە دڵسۆزەکانی ئەم گەلە و شەونخوونی و ماندووبوونی زۆر دەکێشن و هەزاران شەهید و بریندارمان داوە تا هاووڵاتیان لە ئارامی و ئاسایشدا بژین و هەرێمی کوردستان پارێزراوبێت لە هەر جۆرە هەڕەشە و مەترسیەکی تیرۆریستان و مافیاکانی ماددەی هۆشبەر و هاوکاری و پاڵپشتی و دەستخۆشی هاونشتمانیانی دڵسۆز لای ئێمە سەنگی مەحەکە، نەک خۆگڤکرندنەوەی شەریکەکانی تاوان و قاچاخچێتی.

دەزگاکەمان بەمافی خۆی دەزانێت لە دژی هەر جۆرە تۆمەتێکی ناڕەوا و ناوزڕاندنێک، بەرامبەر دەزگا و هێزەکانمان، رێکاری یاسایی بگرێتەبەر.

بەڕێوەبەرایەتی گشتی ئاسایش- هەولێر

2020/1/20

زۆرترین بینراو