#نێچیرڤان بارزانی #مەسرور بارزانی

پەرلەمان ئاگادارى خەرجى مەراسیمى سوێندخواردنى سەرۆکى هەرێم نییە

هەواڵی / 10/6/2019 157 جار بینراوە

پەرلەمان ئاگادارى خەرجى مەراسیمى سوێندخواردنى سەرۆکى هەرێم نییە

 

شه‌ن پرێس:  ناس

خەرجى مەراسیمى سوێندخواردنى سەرۆکى هەرێمى کوردستان لەسەر خەرجى حکومەتى هەرێمى کوردستان بووە، پەرلەمانى کوردستان ئاگادارى خەرجییەکان نییە.
هیوا نەسڕەدین سەرۆکى دیوانى سەرۆکایەتى پەرلەمانى کوردستان بە ناس کورد-ى ڕاگەیاند:”ڕێوڕەسمى سوێند خواردنى نێچیرڤان بارزانى بە هەماهەنگى بووە لەنێوان تیمى پڕۆتۆکۆڵى پەرلەمانى کوردستان و فەرمانگەى پڕۆتۆکۆڵى حکومەتى هەرێمى کوردستان”.

وتیشى:”کارەکە گەورە بوو، پڕۆتۆکۆڵى پەرلەمانى کوردستان ئەوەندە گەورە نییە بۆیە بەهەماهەنگى پڕۆتۆکۆڵى حکومەت ئەو کارەمان کرد، بەڵام بەناوى پەرلەمانەوە”.

هیوا نەسڕەدین سەرۆکى دیوانى سەرۆکایەتى پەرلەمانى کوردستان ئاماژەى بۆ ئەوە کرد، پەرلەمانى کوردستان هیچ خەرجییەکى نەکردووە سەرجەم خەرجییەکان لەسەر تیمى فەرمانگەى پڕۆتۆکۆڵى حکومەت بووە، وتى:”ئاگادارى خەرجى نین، هۆڵەکە هى حکومەتە و میدیاش ڕووداو و کەناڵەکانى دیکە کردوویانە”.

فەرمانگەى پڕۆتۆکۆڵى حکومەتى هەرێمى کوردستان، فەرمانگەیەکى سەربەخۆیە و ڕاستەوخۆ سەربە ئەنجومەنى وەزیرانە، بەپێى کارنامەى حکومەت ئەم فەرمانگەیە ئیدارەى سەرجەم ئەو مەراسیمانە دەدات کە پەیوەستن بە حکومەتى هەرێمى کوردستانەوە، یەکێک لەو مەراسیمانەش (یەڕێوەبردنى مەراسیمى هێنانەوەى تەرمى جەلال تاڵەبانى سکرتێرى پێشووى یەکێتى بوو لە ئەڵمانیاوە بۆ کوردستان”.

بەگوێرەى زانیارى سەرچاوەیەکى تایبەت  لەوەزارەتى دارایى بۆ ناس کورد، ئەوان ئاگادارى وردەکارى خەرجى مەراسیمى سوێندخواردنى نێچیرڤان بارزانى نین، ئەگەر خەرجیش هەبێت ئەوا لەکۆتایى پڕۆسەکەدا بەشێوەى پسوڵە دێتە بەردەستیان، وتى:”فەرمانگەى پڕۆتۆکۆڵى حکومەتى هەرێم بودجەى تایبەت بەخۆیان هەیە، ئەگەر خەرجیەکەیان زیاتر بێت لە بودجەى خۆیان وەزارەتى دارایى بۆیان پاکتاودەکات”.

بەگوێرەى ئامارێکى فەرمى فەرمانگەى پڕۆتۆکۆڵى حکومەتى هەرێمى کوردستان، هەزار و 200 کەسایەتى عێراقى و بیانى بەشداربوون لە مەراسیمى سوێندخواردنەکە ، بەگوێرەى خەمڵاندنەکان ئەگەر هەر میوانێک تەنها بۆ خواردن 50 دۆلارى بۆ خەرجکرابێت، ئەوا 60 هەزار دۆلارى بۆ خەرجکراوە.

ئەمە جگە لە خەرجى (مانەوە و هاتووچۆ، خواردنەوە و کات بەسەربردن، ڕازندنەوەى هۆڵ) کە هەموویان دەچنە خانەى حسابى تایبەتى حکومەت لەژێرناوى (بەڕێوەبردنى مەراسیمەکان)ەوە.

وریا حسین

زۆرترین بینراو