د. ئەحمەد شافیعی هۆكاری كەمكردنەوەی بڕی زەكات و فیدیەی ڕۆژووی ئه‌مساڵ ئاشكرادەكات

هەواڵی / 9/5/2019 872 جار بینراوە

د. ئەحمەد شافیعی هۆكاری كەمكردنەوەی بڕی زەكات و فیدیەی ڕۆژوو ئاشكرادەكات

 

ئەنجوومەنی باڵای فەتوای هەرێمی كوردستان بڕی زەكات و سەرفیترە ئەمساڵ 2019ی دیاری كرد، كە بەراورد بە ساڵانی ڕابردوو دەستكاری بڕەكەی كراوە و ئەندامێكی ئەنجوومەنی فەتوای هەرێم-یش هۆكارەكەی ڕووندەكاتەوە و دەڵێت: “لەبەر بەرژەوەندی هەژاران دەستكاری كراوە”.


بەپێی فەتواكەی ئەنجوومەنی باڵای فەرتوای هەرێم بۆ زەكات بڕی دوو ملیۆن و 500 هەزار دینار دیاری كراوە و هەر كەسێك ئەو بڕە پارەیەی هەبێت و ساڵێك داینابێت، دەبێت بۆ هەر ملیۆنێك بڕی 25 هەزار دینار زەكات بدات، هاوكات بۆ فیدیەی ڕەمەزان-یش بۆ هەر ڕۆژێك بڕی 2 هەزار و 500 دینار دیاریكراوە، كە بۆ تەواوی مانگی ڕەمەزان دەكاتە 75 هەزار دینار.


لە ساڵانی ڕابردوودا بڕی زەكات لە 4 ملیۆن و 500 هەزار دینارەوە لێی دەكەوت و بۆ فیدیەی ڕۆژووی ڕەمەزانیش بۆ هەر ڕۆژێك 3 هەزار دینار دیاری كرابوو، بەڵام ئەمساڵ دەستكاری ئەو بڕە پارانە كراوە و لە تۆڕە كۆمەڵایەتییەكان مشتومڕێكی لەسەر دروست بووە و دەپرسن 2 ملیۆن و 500 هەزار دینار پارەیەكی زۆر كەمە و چۆن دەبێت زەكاتی بچێتە سەر؟ بۆچی پارەی فیدیەی ڕۆژوو كەم كراوەتەوە؟


د. ئەحمەد شافیعی، ئەندامی ئەنجوومەنی باڵای فەتوای هەرێم بۆ (خەڵك) ئاماژەی بەوەكرد، پاش گفتوگۆیەكی زۆر لەسەر ئەو بابەتە گەیشتووینەتە ئەو ئەنجامەی ئەمساڵ دۆخی مووچە باشتر بووە و تا ئەندازەیەك ئەو دەستكورتییەی جاران هەبوو ئێستا كەمبۆتەوە، بۆیە بۆ زەكات بڕیارماندا بڕێكی مامناوەند دابنێین بەو بڕەی دیاری كراوە و ڕامانگەیاندووە.


وتیشی، “ئەو بڕە پارەیە، كە 2 ملیۆن و نیوە ئەگەر ساڵێكی بەسەردا تێپەڕی و دانرابوو لەماڵەوە ئەوا ئەبێت زەكاتی لێ‌ بدرێت بەڕێژەی 2.5%، واتە بۆ هەر ملیۆنێك 25 هەزار دینار .


سەبارەت بە هۆكاری كەمكردنەوەی بڕی پارەی زەكات، د. ئەحمەد شافعی ئاشكرای كرد، لێرەدا زیاتر ڕەچاوی بەرژەوەندی هەژارانمان كردووە، بۆ ئەوەی ڕێژەی زەكات زیاتر بدرێت بە خەڵك و ئەوانەی دەستكورتن زیاتر سوودمەند ببن، چونكە ساڵی ڕابردوو 4 ملیۆن و نیو دیاری كرابوو، بەڵام ئەمساڵ كەممان كردەوە، بۆ ئەوەی زەكاتی زیاتر بدرێت بە هەژاران.


جەختیشی كردەوە، كە بڕەكە هێندە زۆر نییە و ئەگەر كەسێك 4 ملیۆن دیناریشی هەبێت 100 هەزار دینار زەكاتی دەچێتە سەر، بۆیە ئەگەر ئەو پارەیە بدرێتە هەژاران خوای گەورە بەرەكەتی زیاتری تێدەخات و چەند هەژارێكیش لێی سوودمەند دەبێت.


زۆرترین بینراو