#نێچیرڤان بارزانی #مەسرور بارزانی

پیاوێك له‌ ڕێگه‌ی هه‌ڵواسین و به‌كارهێنانی گوێزانه‌وه‌ چاره‌سه‌ری شه‌قیقه‌ و فه‌قه‌رات ده‌كات !

هەواڵی / 6/1/2019 1123 جار بینراوە

پیاوێك له‌ ڕێگه‌ی هه‌ڵواسین و به‌كارهێنانی گوێزانه‌وه‌ چاره‌سه‌ری شه‌قیقه‌ و فه‌قه‌رات ده‌كات !

وەزارەتی تەندروستی دەرەقەتی نایەت
وەزارەتی تەندروستی: كارەكانی شێخ حوسێن مەترسین بۆ سەر تەندروستیی گشتی

شه‌ن پرێس :
پیاوێك لە چەمچەماڵ كە خۆی وەك چارەسەركارێكی گیایی دەناسێنێ، چەندین رێگەی جیاواز بەكاردەهێنێ بۆ چارەسەری نەخۆشی، بەڵام وەزارەتی تەندروستی پێیوایە ئەو كارانەی ئەو هیچ بنەمایەكی زانستییان نییە و ئەركی وەزارەتی ناوخۆ و قایمقامیەتی چەمچەماڵە رووبەڕووی ببنەوە.

حوسێن مستەفا محەممەد، تەمەنی 50 ساڵە و بە شێخ حوسێن ناوبانگی دەركردووە. ئەو دەڵێت 21 ساڵە نەخۆش لەڕێگەی دەرمانی گیایی و شێوازی جیاواز چارەسەر دەكات، ئەو بە (رووداو)ی گوت: "لە ساڵی 1997ـەوە ئەو كارەكە دەكەم و لە ساڵی 2005ـەوە سەنتەری دەرمانی گیاییم لە چەمچەماڵ داناوە، بڕوانامەی كۆمەڵەی رووەكناسانی كوردستان، وەزارەتی تەندروستیی عێراق. ئەكادیمیای میسر و ئێرانیشم هەیە".

ئەو بانگەشەی ئەوە دەكات كە لە یەك خولەكەدا چارەسەری نەخۆشیی شەقیقە دەكات و دەڵێت: "بۆ چارەسەری ئەو كەسانەی تووشی شەقیقە بوون، نەشتەرێكی باریكی نەشتەرگەری یان مووسێك بەكاردەهێنم و چەند شوێنێكی نێوچەوانی بریندار دەكەم، دوای یەك خولەك شەقیقەكە و ژانە سەرەكەی نامێنێ و بۆ هەتا هەتایە چاك دەبێتەوە، ئەم بیرۆكەیەشم لەوەوە وەرگرتووە كە لە سەردەمی فیرعەونەكان، هەر كەسێك شەقیقەی هەبووایە، لەم رێگەیەوە چارەسەریان كردووە".

شێخ حوسێن ئامێرێكی هەڵواسینی مرۆڤی داناوە و دەڵێت نەخۆشی فەقەراتی پشتیش چارەسەر دەكات: "ساڵی 1997 پزیشكێكی تایبەتمەندی فەقەرات شێوازی چارەسەری فەقەراتی فێركردم، ئەویش هەڵواسینی سەرەوخواری مرۆڤ بوو، رێگاكەم بەكارهێنا كە نەخۆشەكە حەوت رۆژ و رۆژانە 7 خولەك هەڵدەواسم و كێشەی فەقەراتی نامێنێ".

بەڵام وەزارەتی تەندروستی كارەكانی شێخ حوسێن رەتدەكاتەوە و پێیوایە ئەو كارانە مەترسین بۆ سەر نەخۆش و تەندروستی گشتی. خاڵس قادر، بەڕێوەبەری گشتی دیوانی وەزارەتی تەندروستی بە (رووداو)ی گوت: "ئەو كارانەی ئەو پیاوە دەیكات زانستی نین و مەترسین بۆ سەر تەندروستیی نەخۆشەكە و تەندروستی گشتیش، بۆیە پێشتر لەڕێگەی قایمقامیەتەوە شوێنەكەیمان داخستووە".

دكتۆر خاڵس قادر گوتیشی: "لەبەرئەوەی ئەو كەسانە پزیشك نین و مۆڵەتیان لە ئێمە وەرنەگرتووە، بۆیە ناتوانین راستەوخۆ لێپرسینەوەیان لەگەڵ بكەین، بۆیە ئەركی وەزارەتی ناوخۆ و پارێزگا و قایقامیەتەكانە رووبەڕوویان ببنەوە، داواش لە هاووڵاتییان دەكەین چارەسەر و دەرمانەكانیان بەكارنەهێنن، بەتایبەتی ئەوانەی نەخۆشی درێژخایەنیان هەیە، چونكە زیانی بۆ كەسەكە و تەندروستیی گشتی هەیە، هەروەها هەڵخەڵەتاندنی خەڵكیشە".

رێبەر رۆستەم، سەرۆكی رێكخراوی جانۆدێرما بۆ پزیشكی تەواوكاری، كە مۆڵەتی فەرمی لە فەرمانگەی رێكخراوە ناحكومییەكان وەرگرتووە، بە (رووداو)ی گوت: " ئەم كەسە بە شفرە و مووس نێوچەوانی نەخۆشەكان بریندار دەكات گوایە فشار لە سەری كەم دەكاتەوە و شەقیقەكەی چارەسەر دەكات، ئەمە هیچ بنەمایەكی زانستی نییە و تەنیا بۆ راكێشانی سەرنجی خەڵك و گەرمكردنی بازاڕی خۆیەتی".

حكومەت چەندینجار شوێنەكەی بە شێخ حوسێن داخستووە، بەڵام ئەو كە خۆی بە "حەكیم" ناودەبات، پێیوایە خزمەتی خەڵك دەكات، بۆیە دژایەتی دەكرێت: "وەزارەتی تەندروستی دژایەتیمان دەكەن، سەدان جار شوێنەكەمان داخراوە، تەنانەت بەهۆی چارەسەركردنی شەقیقەی نەخۆشەكانیش ماوەی 7 مانگ شوێنەكەیان داخستین، ئێستا رێگەمان پێنادەن بیكەین، لەبەرئەوەی بە پارەیەكی كەم دەیكەین، تەنانەت پارە لە خەڵكی هەژار و پێشمەرگە و كەسوكاری شەهیدانیش وەرناگرین".

لە چەند رۆژی رابردوودا شێخ حوسێن گرتەیەكی ڤیدیۆیی بڵاوكردەوە كە تێیدا لەگەڵ كەسێكی دیكە بە چنگ جۆرە گۆیژێك دەخۆن، داواش دەكات خەڵك و بەتایبەت ئەوانەی نەخۆشیی دڵیان هەیە بیخۆن، لەبارەی گرتە ڤیدیۆییەكە بە (رووداو)ی گوت :"لە كۆنەوە بۆ ئەوانەی كێشەی دڵیان هەیە بەكارهێنراوە، نەخۆشەكە لە ماوەیەكی كەمدا چاكبووەتەوە، بۆیە لە ئەڵمانیا توێژینەوەی لەسەر كرا و دەركەوت هەموو كێشەكانی دڵ، گوشاری خوێن و تەنگەنەفەسیش لە ماوەی 3 رۆژدا ناهێڵێ، تەنانەت چەوریی خوێنیش دەتوێنێتەوە و دەمارەكانیش پاك دەكاتەوە، بۆیە بەشێوەی حەب دروستیان كردووە و ئێستا من دەیدەمە نەخۆشەكانم".

بەڵام دوای بڵاوبوونەوەی ڤیدیۆكە، رێكخراوی جانۆدێرما هۆشدارییان دا، رێبەر رۆستەم بە (رووداو)ی گوت: "ناساندن و وەسفكردنی لەڕادەبەری ئەم جۆرە رووەكە بێ مەرام نییە، بەتایبەت كە ئەو دەڵێت بەشێوەی حەب لەلای من هەیە، هەروەها بێجگە لە سوودەكانی، زیانیشی هەیە. ئەگەر بە وریاییەوە بەكارنەهێنرێت دەبێتە هۆی  دروستبوونی نەخۆشی هیمۆفیلیا لەو كەسانەی نەخۆشیی دڵیان هەیە، ناشبێت لەگەڵ دەرمانی نەخۆشیی دڵ بخورێت، چونكە مەترسی بۆ سەر نەخۆشەكە دروستدەكات، هەروەها بەهیچ شێوەیەكیش بۆ ئافرەتی دووگیان نابێت. ئەو كەسانەشی كێشەی برینی گەدە یان هەستیاریی گەدەیان هەیە نابێت بیخۆن، چونكە سكچوون و رشانەوە دروستدەكات، بەڵام ئەو كەسە باسی ئەوانەی نەكردووە".

زۆرترین بینراو