یەکێتی: هاتنی هێزه‌كه‌ی‌ عێراق بۆ خورماتو دڵەڕاوکێی لەناو هاوڵاتیاندا دروستکردووە

هەواڵی / 12/1/2018 165 جار بینراوە

 

 

هێزێکی بەرپەرچدانەوەی خێرای سەر بەسوپای عێراق لە گەڕەکە کوردنشینەکانی شارۆچکەی خورماتو بەتانک‌و زرێپۆشەوە بڵاوەیانپێکراوە، بەرپرسێکی یەکێتیش لەشارۆچکەکە دەڵێت، هاتنی ئەو هێزە دڵەڕاوکێی لەناو هاوڵاتیاندا دروستکردووە.

ئەمڕۆ هه‌ینی‌، هێزێکی بەرپەرچدانەوەی خێرا (رد السریع)ی سەر بەسوپای عێراق، بەژمارەیەک تانک‌و زۆریپۆشەوە چونەتە شارۆچکەی خورماتوی سەر بەپارێزگای سەڵاحەدین.

حەسەن بارام، جێگری بەرپرسی مەڵبەندی ١٦ی حەمرینی یەکێتی نیشتمانی کوردستان، به‌سایتی‌ ڕۆژنیوزی‌ وتووه‌، “هێزێکی زۆری بەرپەرچدانەوەی خێرا هاتونەتە ناو شارۆچکەی خورماتوو ژمارەیەک زۆر سەربازو تانک‌و زریپۆشیان لەگەڵدایەو ترس‌و دڵەڕاوکێیان لای خەڵکی خورماتو دروستکردووە”.

ناوبراو وتیشی، تا ئێستا نازانرێت ئەو هێزە بۆچی هاتون‌و مەبەستیان لەهاتنیان بەو شێوەیە چییە، بەڵام بەپێی زانیارییەکان ئەو هێزە لەجیاتی ئەو هێزانەی دیکە هاتووە کە لەنێو شارۆچکەی خورماتودان.

جێگری بەرپرسی مەڵبەندی ١٦ی حەمرینی یەکێتی ئەوەشی خستۆته‌رو كه‌ ئەو هێزە لەناو هەردو گەڕەکی ڕزگاری‌و کۆماری خورماتو بڵاوەیانپێکراوە کە دو گەڕەکی کوردنشینن بڕیاریشە هەر لەو دو گەڕەکە جێگیربن.

زۆرترین بینراو