15 كورسیی تەزویر لە تۆماری دەنگدەرانی هەرێمی کوردستاندا هەیە

هەواڵی / 8/12/2017 735 جار بینراوە

15 كورسیی تەزویر لە تۆماری دەنگدەرانی هەرێمی کوردستاندا هەیە

شه‌ن پرێس :

بە وتەی پەرلەمانتاران و كۆمیسیۆنی باڵای سەربەخۆی هەڵبژاردنەكان بە هێندەی 15 كورسیی پەرلەمانی كوردستان ناوی ساختە لە تۆماری دەنگدارەندا هەیە، كە 42 هەزاریان تەمەنیان لەسەر نەوەدساڵییەوەیە و 23 هەزاریشیان ئاوارەی عەرەبن.

عەبدولڕەحمان عەلی بڕیاردەری فراكسیۆنی گۆڕان لە پەرلەمانی كوردستان بە ״ئاژانس״ی وت: ״بە تۆماری دەنگدەرانی ئێستاوە هەڵبژاردن نەكرێت باشترە، لەبەر ئەوەی ژمارەیەكی زۆر ناوی دووبارە و مردووی تێدایە ‌و بەشێكی زۆری ئاوارەكانی عێراق و سوریا و ئێرانی تێدا تۆمار كراوە و ناسنامەیان بۆ درووست كراوە ‌و لە ساڵی 2004ه‌وە تاوەكو ئێستا تەنیا 600 ناوی مردووی تێدا ئاشكرا كراوە، لە كاتێكدا لەو ماوە زۆرەدا زۆر لەوە زیاتر هاووڵاتی كۆچی دوایی كردووە.״

وتیشی: ״كۆمیسیۆن دەنگی لەسەر ئەوە داوە كە بۆ هەڵبژاردنی داهاتوو بەم تۆمارە كار نەكرێت ‌و پێ دەچێت تۆماری دەنگدەران بەشی 15 كورسی زیاتر خەوشی تێدا بێت״.

ئەوەش لە كاتێكدایە كەمتر لە شەش مانگ ماوە لە بەردەم ئەنجامدانی هەڵبژاردنی پەرلەمانی كوردستان و سەرۆكایەتیی هەرێمدا.

شێروان زرار وتەبێژی كۆمیسیۆنی هەڵبژاردنەكان و ڕاپرسیی هەرێم بە ״ئاژانس״ی وت: ״پەیڕەوێكمان دەركردووە بە ناوی بژاركردنی تۆماری دەنگدەران بۆ پاكکردنەوەی تۆمارەكە، لە ماوەی 15 ڕۆژدا كەموكورتییەكان دەخاتە ڕوو بۆ ئەوەی كۆمیسیۆن ئیشی لەسەر بكات.״

وتیشی: ״ئەوانەی تەمەنیان لە سەروو 90ساڵەوەیە ژمارەیان 41 هەزار و 899 كەسە، كە بەشێكی زۆریان لە ژیاندا نەماون‌ و تۆماری دەنگدەران بەشێكی زۆری ناوی ئاوارەكانی ناوەڕاست و خوارووی عێراقی تێدایە، كە مافی دەنگدانیان لە هەرێمدا نییە ‌و ژمارەیان 23 هەزار كەس دەبێت״.
سه‌رچین ساڵح