دادگا تانەی نەجمەدین کەریمی سەبارەت بە دوورخستنەوەی لە پارێزگاری کەرکوک ڕەتکردەوە

هەواڵی / 14/11/2017 255 جار بینراوە

بڕیاره‌كه‌ ئیداریە نەک یاسایی
دادگا تانەی نەجمەدین کەریمی سەبارەت بە دوورخستنەوەی لە پارێزگاری کەرکوک ڕەتکردەوە
شه‌ن پرێس:

دادگای باڵای فیدڕاڵی تانەیەکی نەجمەدین کەریمی دژ بە بڕیاری پەرلەمانی عێراقی ڕەتکردەوە، سەبارەت بە دوورخستنەوەی لە پۆستی پارێزگاری کەرکوک، دادگاش ڕایگەیاند، ئەو بڕیارە لە دەرەوەی دەسەڵاتیدایە.

ئیاس ساموک وتەبێژی دادگای باڵای فیدڕاڵی ئەمڕۆ (١٤ی تشرینی دووەم) لە بەیانامەیەکدا کە کۆپیەکی دەست کەناڵی ئێن ئاڕ تی کەوتووە ئاماژەی بەوەداوە "دادگای باڵای فیدڕاڵی کۆبووەتەوە و تاوتوێی دۆسیەیەکی نەجمەدین کەریم پارێزگاری کەرکوکی کردووە، لە دژی سەرۆکی پەرلەمانی عێراق، بۆ تانەلێدان لە بڕیاری پەرلەمانی عێراق سەبارەت بە دوورخستنەوەی لە پۆستی پارێزگاری کەرکوک".

وتەبێژی دادگای باڵای فیدڕاڵی دەشڵێت "دادگا وەڵامی داواکەی داوەتەوە و جەختلەوەدەکاتەوە کە بڕیاری دوورخستنەوەی لە پۆستی پارێزگاری کەرکوک بڕیارێکی ئیداریە نەک بڕیارێکی یاسایی تا دادگای باڵای فیدڕاڵی بتوانێت بڕیاری لەسەربدات".

ئەمە لە کاتێکدایە پەرلەمانی عێراق مانگی ئەیلولی ڕابردوو دەنگیدا لەسەر دوورخستنەوەی نەجمەدین کەریم لە پۆستی پارێزگاری کەرکوک، دواتریش نەجمەدین کەریم بە ئێن ئاڕ تی وت، هەموو ڕێکارێکی یاسایی لەبەرامبەر بڕیارەکەی پەرلەمانی عێراقدا دەگرێتەبەر.

زۆرترین بینراو