سێكس و ئه‌لكحـــول

هەواڵی / 10/10/2017 1699 جار بینراوە

سێكس و ئه‌لكحـــول

شه‌ن پرێس :
د.ئه‌فرام محمد - پسپۆری نه‌خۆشیه‌ ده‌رونیه‌كان

مرۆڤ له‌ دێر زه‌مانه‌وه‌ مه‌ی ناسیوه‌و هه‌وڵی داوه‌ له‌ به‌ری زیاتر له‌ دره‌ختێك به‌ده‌ستی بهێنێ و له‌ پیاهه‌ڵدانیدا زۆری ووتوه‌ و نه‌یارانی له‌باسی زیانیدا زیاتریان ووتووه‌ و هه‌ندێ میلله‌ت له‌ هه‌ندێكی تر زیاتر ده‌خوَنه‌وه‌ و هه‌ندێكی تر به‌ناوبانگن به‌به‌كارهێنانی جۆرێك مه‌ی‌ وه‌ك له‌ جۆرێكی تر و شارنشین زیاتر به‌كاری دێنی وه‌ك له‌ دانیشتوانی لادێ. هه‌ڵوێستی ئاینیش دیاره‌ له‌مه‌ر مه‌ی خواردنه‌وه‌ (به‌ پێی ئیسلام خواردنه‌وه‌و بازرگانی پێكردن و باركردن و ته‌نانه‌ت نوسه‌ری په‌یوه‌ستنامه‌ بازرگانییه‌كه‌ی‌ به‌ كارێكی حه‌رام داناوه‌ هه‌ر له‌ بیره‌وه‌ تا ویسكی له‌ ژێر رۆشنایی هه‌موو مه‌ستكه‌رێك حه‌رامه‌).
راگه‌یاندن كاریگه‌ری گه‌وره‌ی هه‌بووه‌ له‌ هاندانی تاكه‌كان بۆ خواردنه‌وه‌و راگه‌یاندنی كوردیش كه‌مته‌رخه‌می نه‌كردووه‌ و هه‌ندێ له‌ زنجیره‌ ته‌له‌فزیۆنییه‌ ( كه‌ناڵه‌ ئاسمانیه‌ !!!) كوردیه‌كان سه‌باره‌ت به‌ تاكی مه‌ی خۆر پێچه‌وانه‌ی هه‌موو راستی یه‌ زانستی و كۆمه‌ڵایه‌تی و ده‌رونییه‌كان ده‌خه‌نه‌ روو. (له‌ پێناوی‌........... ؟؟!!)

ئه‌وه‌ی سه‌رنج راكێشه‌ هه‌ندێ تاك ده‌خۆنه‌وه‌ به‌بیانووی ئه‌وه‌ی له‌ رووی سێكسیه‌وه‌ چالاك بن و به‌ سیمایه‌كی پیاوه‌تی داده‌نێن و به‌ خه‌م ره‌وێنی گرفته‌ ده‌رونیه‌كان ده‌زانن، به‌ڵام پێچه‌وانه‌ی ئه‌و بۆچوونانه‌ پراوپر راستیه‌كانن ، چونكه‌ سه‌رجه‌م توێژینه‌وه‌ زانستیییه‌كان ئه‌و راستیانه‌ ده‌سه‌لمێنن كه‌ تاكی مه‌ی خۆر توانا و ئاره‌زووی سێكی كه‌متره‌ له‌ تاكی ئاسایی(به‌پێی توێژینه‌وه‌یه‌ك زیاتر 50% ی‌ مه‌ی خۆر ئه‌م حاله‌ته‌یان هه‌یه‌) و ژماره‌ی سپێرمه‌كانی كه‌متره‌ و گوونه‌كانی ده‌پوكێنه‌وه‌ و مه‌مكه‌كانی گه‌وره‌تر ده‌بێت (بێگومان باس له‌ مه‌مكی پیاو ده‌كه‌ین) ، توانای ره‌پبوونی نامێنێ یان ناتوانێ له‌و باره‌دا بمێنێته‌وه‌ بۆ ماوه‌ی پێویست ( نزیكه‌ی 50% ی‌ مه‌ی خۆران به‌ پێی زیاتر له‌ توێژینه‌وه‌یه‌ك به‌ده‌ست ئه‌م حاله‌ته‌وه‌ ده‌ناڵێنن) ناره‌حه‌تی له‌ هاویشتندا یان توشی حاله‌تی دره‌نگ هاویشتن ده‌بن، توندوتیژی‌ سێكسی له‌ كه‌سانی تر زیاتره‌ و حاله‌تی نه‌زۆكی له‌ مه‌ی خۆردا زیاتره‌ له‌ تاكی ئاسایی، هه‌روه‌ها ئه‌لكحول ده‌بێته‌ هۆی كه‌م بوونه‌وه‌ی ئاستی هۆرمۆنی تێستۆستیرۆن . ئه‌و كاریگه‌ریانه‌ی سه‌ره‌وه‌ له‌ تاكێكه‌وه‌ بۆ تاكێكی تر ده‌گۆرێت واته‌ برێكی دیاری كراو نییه‌ گه‌ر تاك به‌ كاری بهێنێت توشی ئه‌م حاله‌تانه‌ ببێت ده‌شێ یه‌كێك به‌ برێكی كه‌م وكه‌سێكی تر به‌برێكی زۆر ، تاكێك گیرۆده‌ی یه‌كێ له‌و زیانانه‌ بێت ویه‌كێكی تر گیرۆده‌ی زیانێكی تر . سه‌باره‌ت به‌وه‌ی ئایا پاش راگرتنی مه‌ی خواردنه‌وه‌ تاك وه‌كو خۆی ئاسایی ده‌بێته‌وه‌ و ماوه‌ی چه‌ندی‌ ده‌وێ بۆ گه‌ڕاندنه‌وه‌ بۆ حاله‌تی ئاسایی؟ له‌ ڕاستیدا ماوه‌ی پێویست بۆ گه‌ڕاندنه‌وه‌ بۆ باری ئاسایی دیار نییه‌ ، به‌پێی توێژینه‌وه‌یه‌ك له‌سه‌ر 17,000 مه‌ی خۆر كراوه‌ پاش وازهێنانیان له‌مه‌ی خواردن بۆ چه‌ند ساڵێك له‌ 50% یان توانای ره‌پبونیان گه‌ڕاوه‌ته‌وه‌ باری ئاسایی و ئه‌وانی تر به‌رده‌وام سكاڵایان هه‌بووه‌ له‌ توانای ره‌پبوون. سه‌باره‌ت به‌ سیمای پیاوه‌تی زۆر جار تاكی شه‌رمۆك یان ترسنۆك په‌نا ده‌باته‌ به‌ر مه‌ی خواردن كاتێ له‌ده‌ست كێشه‌كان راده‌كات وناتوانێ چاره‌سه‌ری بكات وه‌ك هه‌ڵهاتنێكی ترسنۆكانه‌ خۆی له‌ دنیا بێئاگا ده‌كات، بۆ ساتێ یا بۆ هه‌میشه‌ عه‌قل و ژیری وه‌لاوه‌ ده‌نێت !
له‌روووی ده‌روونیشه‌وه‌ ڕه‌نگه‌ مه‌ی خواردنه‌وه‌ ببێته‌ هۆی كه‌مكردنه‌وه‌ی یان بێئاگایی له‌ خه‌مۆكی تا ماوه‌یه‌كی كورت به‌ڵام مه‌ی خواردنه‌وه‌ به‌ یه‌كێك له‌ هۆكاره‌كانی خه‌مۆكی داده‌نرێت توێژینه‌وه‌ زانستیه‌كان ئاماژه‌ به‌وه‌ ده‌كه‌ن رێژه‌ی خه‌مۆكی له‌ نێوان مه‌ی خۆره‌كاندا زیاتره‌ وه‌ك له‌ كه‌سانی تر.
له‌م ساڵانه‌ی دواییدا مه‌ی خواردنه‌وه‌ له‌ نێوان خانمانیش به‌ رێژه‌یه‌كی به‌رچاو هه‌ست پێده‌كرێت (باس له‌ كۆمه‌ڵگه‌ی خۆمان ده‌كه‌م)، گومانی‌ نیه‌ زیانی مه‌ی له‌ مێدا زیاتره‌ وه‌ك له‌ نێر و به‌برێكی كه‌متر زیانه‌كان ده‌رده‌كه‌ون وه‌كو تێكچوونی سوری مانگانه‌ و كه‌مبوونه‌وه‌ی تایبه‌تمه‌ندیه‌ سێكسیه‌كانی مێ و نه‌زۆكی و پوكانه‌وه‌ی هێلكه‌دان .

بیرمان نه‌چێ په‌یوه‌ندی سێكسی نادروست له‌گه‌ل تابۆدا واته‌ له‌گه‌ل كه‌سانی پله‌یه‌ك و ئه‌وانه‌ی ناشێ كاری سێكسیان له‌گه‌ل بكرێت له‌ نێوان مه‌ی خۆراندا زۆر زیاتره‌ وه‌ك له‌ كه‌سانی تر و چیرۆكی ده‌ست درێژی كردنه‌ سه‌ر خوشك و دایك وخێزانی باوك و…… له‌لایه‌ن تاكی مه‌ی خۆره‌وه‌ شتێكی نامۆ نییه‌ له‌ واقیعی كۆمه‌ڵگادا ده‌یان چیرۆك هه‌یه‌ ئه‌مه‌ له‌لایه‌ك و له‌ لایه‌كی تره‌وه‌ ده‌شێ لاوازی سێكسی تاكی مه‌ی خۆر هانده‌ر بێت بۆ ئه‌وه‌ی هاوسه‌ره‌كه‌ی خیانه‌تی لێبكات له‌به‌ر ئه‌وه‌ی ئه‌م ناتوانێ به‌ ئه‌ركه‌كانی هاوسه‌ری هه‌ڵسێت له‌لایه‌كی‌ تره‌وه‌ وه‌ك تۆله‌ كردنه‌وه‌ك بۆ هه‌ڵوێسته‌ كۆمه‌ڵایه‌تییه‌ ناشرینه‌كانی مه‌ی خۆر كه‌ زۆرجار هاوسه‌ری پێوه‌ گیرۆده‌ ده‌بێت وكاریگه‌ری‌ له‌سه‌ر سه‌رجه‌م تاكه‌كانی خێزان هه‌یه‌.
هه‌ندێ جار تاكی مه‌ی خۆر به‌هۆی لاوازی خۆیه‌وه‌ توشی حاله‌تی وه‌هم ده‌بێت به‌رامبه‌ر به‌ خێزانه‌كه‌ی و توهمه‌تی ناپاكی ده‌خاته‌ پاڵ، ڕه‌نگه‌ ئه‌مه‌ جۆرێك بێت له‌ میكانیزمی به‌رگری تاكو له‌ لاوازی و فه‌شه‌ل رابكات.
گه‌لێ له‌ ناودارانی جیهان سه‌ره‌رای سه‌ركه‌وتنیان له‌ بواره‌كه‌ی خۆیاندا به‌ هۆی ئالووده‌بونیان به‌ مه‌ی و ئه‌و گرفتانه‌ی له‌وه‌ ده‌كه‌ونه‌وه‌ هاوسه‌ره‌كانیان به‌جێیان هێشتوون وه‌كو سقرات وڤان كوخ وئه‌حمه‌د شه‌وقی وبیرۆن وشۆمان و ئۆسكار وایلد. له‌كۆتاییدا ده‌ڵێم مه‌ی ده‌بێته‌ به‌ردانی زمان و نه‌مانی ته‌وازن و زیادكرنی توندوتیژی و لاوازی جه‌سته‌ و ماڵ ئاوایی كردن له‌ سێكسی‌ دروست .


زۆرترین بینراو