ده‌ ڕۆژی حاجیان ( نۆمینه‌ی حاجیان )

هەواڵی / 26/8/2017 667 جار بینراوە

ده‌ ڕۆژی حاجیان ( نۆمینه‌ی حاجیان )

شه‌ن پرێس :
نوسینی : مامۆستا عبدالحمید ناسراو به‌ کوڕی پاک


به‌ناوی خوای گه‌وره‌ و میهره‌بان.
ناوه‌ ناوه‌ پێویستمان به‌ نوێ کردنه‌وه‌ی باوه‌ڕه‌ بۆ نه‌رم کردنه‌وه‌ی دڵه‌کانمان له‌ تاوان و بێ ئاگایی له‌ خوا تا به‌ گوێ گرتن له‌ قورئانی پیرۆز و فه‌رمووده‌کانی پێغه‌مبه‌ر درودی خوای له‌سه‌ر بێت به‌خته‌وه‌ر ببین و باوه‌ڕمان پێوه‌ زیاد ببێت.
بۆیه‌ خوای په‌روه‌ردگار به‌ ره‌حم و به‌زه‌یی خۆی چه‌ند بنکه‌یه‌کی پشوودانی بۆ موسوڵمانان بڕیارداوه‌ بۆ ئه‌وه‌ی خۆیان له‌ گوناهوو تاوانا پاک بکه‌نه‌وه‌و دووباره‌ بکه‌ونه‌وه‌ ڕێ بۆ قیامه‌ت تا به‌ پاکی له‌ دونیا ده‌ر بچن بۆ دووا ڕۆژ .
ئینجا ده‌ ڕۆژی حاجیانیش یه‌کێکن له‌و بنکانه‌ی که‌ خوای په‌روه‌ردگار بڕیاری داون بۆ خۆ پاک کردنه‌وه‌ له‌ تاوان و گوناها هه‌روه‌ها وه‌گڕدانی ئیمانه‌ بۆ به‌رده‌وام بوون له‌ سه‌ر ئه‌و ناز و نیعمه‌ته‌ که‌ ئیسلامی پیرۆزه‌ .
باشترین هه‌له‌ مرۆڤ بیقۆزێته‌وه‌ بۆ خۆ پاک کردنه‌وه‌ له‌ گوناهوو تاوانا و زیاد کردنی ئیمان، ئه‌و سات و کاته‌یه‌ که‌ خودای په‌روه‌ردگار له‌ به‌نده‌کانی نزیک ده‌بێته‌وه‌ ‌ ده‌رگای لێخۆشبونیان بۆ ده‌کاته‌وه‌، وه‌ کارێکی که‌م پاداشتێکی زۆر، هه‌روه‌ها کاتی قه‌بوڵ بوونی دوعا و پاڕانه‌وه‌ بێت .
بۆیه‌ ئه‌مه‌ ده‌ی حاجییان به‌ڕێوه‌یه‌ خوای په‌روه‌ردگار تایبه‌تمه‌نداییه‌کی تایبه‌تی به‌م ده‌ ڕۆژه‌ به‌خشیوه‌ بۆ به‌هێز کردنی ئیمان و نه‌رم کردنه‌وه‌ی دڵه‌کان، ‌هیچ ڕۆژێک ئه‌و تایبه‌ت مه‌ندییه‌ی نیه‌ ئینجا نه‌که‌ی له‌ده‌ستت بچێت و بی ئاگا بیت له‌ به‌نداییه‌تی خوادا . گه‌وره‌یی ئه‌و ده‌ ڕۆژه
پێغه‌مبه‌ر درودی خوای له‌سه‌ر بێت ده‌فه‌رموێت [ما من أيام العملُ الصالحُ فيها أحب إلى الله من هذه الأيام"، قالوا: يا رسول الله، ولا الجهاد في سبيل الله؟ قال: "ولا الجهاد في سبيل الله إلا رجلاً خرج بنفسه وماله، ثم لم يرجع من ذلك بشيء ] رواه البخاري واتا : هیچ ڕۆژێک نیه‌ هاوشێوه‌ی ئه‌و ڕۆژانه‌ کار و کرده‌وه‌ی چاکی تێدا خۆشه‌ویست بێت به‌لای خوادا ‌، وتیان پێغه‌مبه‌ری خوا جیهادیش ؟
پێغه‌مبه‌ر درودی خوای له‌سه‌ر بێت له‌ وه‌ڵامدا ووتی نه‌ جیهادیش له‌ پێناو خوادا مه‌گه‌ر که‌سێک خۆیی و سه‌روه‌ت و سامانی به‌رێت بۆ جیهاد هیچی نه‌گه‌رێته‌وه‌ .
که‌واته‌ هیچ ڕۆژ و ساتێک نیه‌ کرده‌وه‌ی چاکی تێدا خۆشه‌ویست بێت به‌لای خوادا و پله‌و پایه‌ی کرده‌وه‌ ئه‌جر و پاداشتی زۆری له‌سه‌ر بێت وه‌ک ئه‌و ده‌ ڕۆژه‌ .
بۆیه‌ خوای په‌روه‌ردگار له‌ قورئانی پیرۆزدا به‌ تایبه‌تی ئاگادارمان ده‌کاته‌وه‌ بۆ به‌ندایه‌تی کردنی خوا له‌و چه‌ند ڕۆژه‌دا که‌ ده‌فه‌رمووێت [ وَيَذْكُرُوا اسْمَ اللهِ فِي أَيَّامٍ مَّعْلُومَاتٍ ] الحج 28
واتا :یادی خواش بکه‌ن و ناوی پیرۆزی به‌رده‌وام له‌سه‌ر زاریان بێت له‌ ڕۆژانێکی دیاریکراودا، ڕۆژانی دیاری کراویش وه‌ک ئیبنو عه‌باس ده‌فه‌رمووێت ده‌ ڕۆژه‌که‌ی حاجیانه‌ .
به‌ڵێ ده ‌ڕۆژه‌که‌ی حاجیان گه‌وره‌ییان زیاتره‌ له‌ ده‌ شه‌وه‌که‌ی به‌ پێچه‌وانه‌ی شه‌وه‌کانه‌ [ لیلة القدر] که‌واته‌ ده‌بێت ڕۆژه‌که‌ی زیاتر ئاوه‌دان بکه‌ینه‌وه‌ به‌ زیکر و ویردی خوا وه‌ک له‌ شه‌وه‌که‌ی .
هه‌روه‌ها خوای په‌روه‌ردگارسوێند به‌و ده‌شه‌وه‌ ده‌خوات له‌ سوڕه‌تی [ الفجر ] که‌ ده‌فه‌رمێت [ وَالْفَجْرِ (1) وَلَيَالٍ عَشْر] واتا :سوێند به‌ به‌ره‌ به‌یان ، سوێندم به‌و ده‌ شه‌وانه‌ی [ ده‌شه‌وی مانگی حاجیانه‌] هه‌روه‌ها له‌م ده‌ڕۆژه‌دا ڕۆژی عه‌ره‌فه‌ی تێدایه‌ که‌ نۆیه‌مین ڕۆژیه‌تی ڕۆژی حه‌جه‌ ئه‌وه‌ی له‌ عه‌ره‌فه‌ ئاماده‌ نه‌بێت حه‌جی به‌رناکه‌وێت و قه‌بوڵ نیه‌ .
هه‌روه‌ها ڕۆژی قوربانیدانی تێدایه‌ که‌ ده‌یه‌مین ڕۆژیه‌تی به‌لای زۆرێک له‌ زانایان گه‌وره‌ترین و پیرۆزترین ڕۆژه‌ به‌لای خوادا چۆن پێغه‌مبه‌ر درودی خوای له‌سه‌ر بێت ده‌فه‌رمووێت [أعظم الأيام عند الله يوم النحر، ...] رواه أبو داود والنسائي وصححه الألباني

کرده‌وه‌ باشه‌کان له‌م ده‌ ڕۆژه‌دا

1 : ته‌وبه‌
له‌ هه‌ر کاتێک له‌و کاته‌ پیرۆزانه‌دا موسوڵمان پێویسته‌ ته‌وبه‌ بکات چونکه‌ ته‌وبه‌ کردن به‌خته‌وه‌ری دنیاو دوا ڕۆژی تێدایه‌ خوای په‌روه‌ردگار ده‌فه‌رمووێت [ وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ ] النور:31 واتا : هه‌مووتان ئیمانداران به‌ره‌و لای خوا و ڕه‌زامه‌ندی ئه‌و بگه‌ڕێنه‌وه‌ بۆ ئه‌وه‌ی ڕزگار و سه‌رفراز بن .

2 : خۆ دوور گرتن له‌ تاوان و بێ فه‌رمانی خوا .

چۆن ته‌وبه‌ له‌خوامان نزیک ده‌کاته‌وه‌ گوناهوو تاوانیش به‌هه‌مان شێوه‌ هۆکاری دورکه‌وتنه‌وه‌مانه‌ له‌ خودای په‌روه‌ردگار له‌ هه‌موو کات و ساتێکدا به‌ تایبه‌تیش له‌و ده‌ڕۆژه‌ پیرۆزه‌دا .

3 : باوه‌ڕ به‌خۆ بوون و خۆ تاودان و کۆش‌ش کردن بۆ وه‌ده‌ست هێنانی خێر و گه‌وره‌یی ئه‌م ڕۆژانه‌ .

هه‌رکه‌سێک باوه‌ڕی به‌خۆی بێت و خۆی هان بدات و کۆشش بکات بۆ به‌ندایه‌تی و ڕه‌زامه‌ندی خوا، خوای به‌خشنده‌و میهره‌بان پشتی ده‌گرێت و سه‌ری ده‌خات بۆیه‌ خوای په‌روه‌ردگار ده‌فه‌رمووێت [ وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَع الْمُحْسِنِينَ ] العنكبوت:69 واتا : ئه‌وانه‌ش له‌ پێناو ئێمه‌داو بۆ به‌ده‌ستهێنانی ڕه‌زامه‌ندی ئێمه‌ هه‌وڵ و کۆشه‌شیان کردوه‌ و خۆیان ماندوو کردوه‌، سوێند به‌خوا به‌راستی ئه‌مانه‌ ڕێنمویی ده‌که‌ین بۆ هه‌موو ڕێگه‌یه‌کی چاک و دروستی خۆمان.
4 : نوێژ له‌ کاتی خۆیدا له‌ هه‌ر شوێنێک بیت

سوننه‌ته‌ نوێژه‌کان له‌ کاتی خۆیدا بیکه‌یت و ئه‌مه‌یان گه‌وره‌ترین و چاکترین عیباده‌تن بۆ له‌ خوا نزیک بونه‌وه سه‌وبان ده‌فه‌رمووێت بیستم له‌ پێغه‌مبه‌ری خوا درودی خوای له‌سه‌ر بێت ده‌یفه‌رموو [عليك بكثرة السجود لله فإنك لا تسجد لله سجدة إلا رفعك إليه بها درجة ، وحط عنك بها خطيئة] رواه مسلم واتا : زۆر کڕنۆش به‌ره‌ بۆ خوا به‌ بردنی هه‌ر کڕنۆشێک بۆ خوا پله‌و پایه‌یه‌ک له‌ خوا نزیک ده‌بیته‌وه‌ و گوناهێکت لێ هه‌ڵده‌وه‌رێ به‌ بردنی کرنۆشه‌که‌.
وه‌ زۆر له‌ سوننه‌ته‌کانیش ئه‌نجام بده‌ چونکه‌ یه‌که‌کن له‌و شتانه‌ی که‌ له‌خوا نزیکمان ده‌کاته‌وه‌ هه‌موو کات، چۆن له‌ فه‌رمووده‌ی قودسیدا هاتووه‌ [وما يزال عبدي يتقرب إليّ بالنوافل حتى أحبه ] رواه البخاري 5 : به‌ ڕۆژو بوون
به‌ ڕۆژو بوون ده‌رگای چونه‌ ژوره‌وه‌ی خوا په‌رستییه‌، له‌ هه‌ندێک له‌ خێزانه‌کانی پێغه‌مبه‌ر درودی خوای له‌سه‌ر بێت هاتووه‌ پێغه‌مبه‌ری خوا نۆ ڕۆژه‌که‌ی حاجیان به‌ ڕۆژو بووه‌ وه‌ ڕۆژی عاشورا وه‌ هه‌روه‌ها سێ ڕۆژ له‌ مانگێکا که‌ [ایام البیض ]ی پێ ده‌وترێت [ كان رسول الله صلى الله عليه وسلم یصوم تسع ذي الحجة ويوم عاشوراء وثلاثة أيام من كل شهر ] رواه أحمد وأبو داود والنسائي وغيرهم به‌تایبه‌تی به‌ڕۆژو بوونی ڕۆژی عه‌ره‌فه‌ که‌ نۆیه‌م ڕۆژیه‌تی پێغه‌مبه‌ر درودی خوای له‌سه‌ر بێت ده‌فه‌رموێت [أحتسب على الله أن يكفر السنة التي قبله والسنة التي بعده ] رواه مسلم واتا :
داوام وایه‌ له‌ خوای به‌خشنده‌ له‌ سالی پێشتری و دواتری گوناهه‌کان خۆش ببێت.
به‌ڵام بۆ حاجیه‌کان که‌ له‌ حه‌جن سوننه‌ته‌ ئه‌و ڕۆژ به‌ ڕۆژو نه‌بن چونکه‌ پێغه‌مبه‌ر به‌ ڕۆژو نه‌بوه‌ له‌ کاتی ئاماده‌ بوونی له‌ عه‌ره‌فه‌ دا وه‌هه‌روه‌ها یه‌که‌که‌ له‌و کرده‌وانه‌ی که‌ خوای گه‌وره‌و میهره‌بان خۆی ده‌فه‌رمێت له‌ فه‌رموده‌ی قودسیدا هه‌موو کرده‌وه‌یه‌کی ئینسان بۆخۆیه‌تی ته‌نها ڕۆژو نه‌بێت ڕۆژو بۆ منه‌و من پاداشتی رۆژوگر ده‌ده‌مه‌وه‌ [كل عمل ابن آدم له إلا الصوم فإنه لي وأنا أجزي به ] متفق عليه 6 : التكبير والتهليل والتحميد
ئه‌و سوننه‌ته‌ له‌ بیر کراوه‌ هه‌ر له‌ یه‌که‌م ڕۆژی حاجیاندا سوننه‌ته‌ التكبير والتهليل والتحميد بکه‌یت چونکه‌ له‌ فه‌رمووده‌ی پێغه‌مبه‌ردا هاتووه‌ درودی خوای له‌سه‌ر بێت ابن عومر بۆمان ده‌گێرێته‌وه‌ و ده‌فه‌رمووێت [فأكثروا من التهليل والتكبير والتحميد ] هه‌روه‌ها ئیمام بوخاری ده‌فه‌رمووێت ابن عومه‌ر و ابی هوڕه‌یره‌ ره‌زای خوایان له‌سه‌ر بێت له‌و ده‌ ڕۆژه‌ ده‌رده‌چون بۆ نێو شار و ده‌نگیان به‌رز ده‌کرده‌وه‌ به‌ ته‌کبیری خوا .

چۆنیه‌تی ته‌کبیریش چه‌ند شێوه‌یه‌ک هاتووه‌ وه‌ک
الله أكبر ، الله أكبر ، الله أكبر كبيرا الله أكبر ، الله أكبر ، لا إله إلا الله ، والله أكبر ، والله أكبر ، ولله الحمد الله أكبر ، الله أكبر ، الله أكبر ، لا إله إلا الله ، والله أكبر ، الله أكبر ولله الحمد

7 : به‌خشینی ماڵ له‌پێناو خوادا
به‌خشینی سه‌روه‌ت و سامان به‌سه‌ر هه‌ژاران و ده‌ست کورتان له‌به‌ر خاتری خوادا یه‌که‌که‌ له کۆی کرده‌وه‌ چاکه‌کان.
خوای په‌خشنده‌ و میهره‌بان ده‌فه‌رمووێت [يَا أَيُّهَا الَّذِينَ آمَنُواْ أَنفِقُواْ مِمَّا رَزَقْنَاكُم مِّن قَبْلِ أَن يَأْتِيَ يَوْمٌ لا بیع فِيهِ وَلاَ خُلَّةٌ وَلاَ شَفَاعَةٌ وَالْكَافِرُونَ هُمُ الظَّالِمُونَ] البقرة:254 واتا : ئه‌ی ئه‌وانه‌ی باوه‌ڕتان هێناوه‌ له‌و ماڵ و سامان و داراییه‌ی که‌ پێمان به‌خشیون، ببه‌خشن، پێش ئه‌وه‌ی ڕۆژێک بێت که‌ کڕین و فرۆشتن و دۆستایه‌تی و تکاکاری تێدا نیه‌ {ئه‌و ڕۆژه‌ } بێ باوه‌ڕان هه‌رخۆیان له‌ ریزی سته‌مکاراندان .
هه‌روه‌ها پێغه‌مبه‌ر درودی خوای له‌سه‌ر بێت ده‌فه‌رمووێت [ ما نقصت صدقة من مال ] رواه مسلم واتا : به‌خشین، ماڵ و سامان که‌م ناکات .
ئینجا به‌و یه‌قینه‌ بژی باوه‌ری ته‌واوت هه‌بێت که‌ به‌خشین ماڵ که‌م ناکات به‌ڵکوو به‌ پێچه‌وانه‌وه‌ زیادی ده‌کات ئینجا له‌ هه‌موو کاتێک به‌رده‌وامبه‌ به‌ به‌خشینی سه‌روه‌ت و سامان به‌سه‌ر هه‌ژاران و ده‌ست کورتان به‌تایبه‌تی ئه‌م چه‌ند ڕۆژه‌ .

8 : زه‌رده‌خه‌نه‌ و ڕووگه‌شیت به‌ ڕووی خه‌ڵکا
پێکه‌نین و زه‌رده‌خه‌نه‌ کلیلی دڵه‌کانه‌ ئینجا له‌م چه‌ند ڕۆژه‌دا پێویستمان به‌ خێر و خێراتی زۆر هه‌یه‌ بۆیه‌ پێغه‌مبه‌ر دروودی خوای له‌سه‌ر بێت ده‌فه‌رمووێت [ تبسُّمك في وجه أخيك صدقةٌ لك ] سلسلة الصحيحة للألباني
واتا : زه‌رده‌خه‌نه‌ و ڕوو گه‌شیت به‌ ڕوی براکه‌ت سه‌ده‌قه‌یه‌ .
ئه‌مه‌ بۆ هه‌موو کاتێکه‌ به‌ڵام بۆ ئه‌م کاته‌ش به‌ تایبه‌تی نه‌وه‌ك مووسوڵمان ڕووی ترش و تاڵ وا ده‌زانیت تازه‌ له‌ دۆزه‌خ گه‌راوه‌ته‌وه‌، چیه‌ بۆ واییت ؟ بڵێم چی ته‌وبه‌ کارم، ئه‌مه‌ پێچه‌وانه‌ی ته‌وبه‌یه‌ و پێچه‌وانه‌ی سوننه‌ته‌ . 9 : لادانی به‌ربه‌ست و ناخۆشی و پیسی له‌ ڕێگه‌ی خه‌ڵکا ابی هوڕه‌یره‌ بۆمان ده‌گێڕێته‌وه‌ له‌ پێغه‌مبه‌ری خوا درودی خوای له‌سه‌ر بێت که‌ فه‌رموویه‌تی [نزع رجل لم يعمل خيرًا قط غصن شوك عن الطريق إما كان في شجرة فقطعه وألقاه، وإما كان موضوعًا فأماطه فشكر الله له بها فأدخله الجنة ] رواه أبو داود واتا : پیاوێک هیچ چاکه‌یه‌کی ئه‌نجام نه‌دابوو له‌ ژیانا جارێکیان دڕکێک له‌ڕێگه‌ی موسڵمانان لاده‌دات یان به‌ دارێکه‌وه‌ بووه‌ و لێی کردۆته‌وه‌ و فڕێی داوه‌ خوای په‌روه‌ردگار سوپاسی ده‌کات و لێی خۆش ده‌بێت به‌و کاره‌ی ده‌یخاته‌ به‌هه‌شته‌وه‌ . ئایینی ئیسلام هه‌ر له‌سه‌ره‌تای سه‌رهه‌ڵدانیه‌وه‌ بانگێشه‌ی هاوکاری و لادانی ناره‌حه‌تی و پیسی ده‌کات ئه‌م جۆره‌ کاره‌ش یه‌که‌که‌ له‌و کارانه‌ی پاداشتێکی زۆری له‌ سه‌ر وه‌رده‌گریت هه‌روه‌ها یه‌کێکه‌ له‌ به‌شه‌کانی ئیمان .

10 : قورئان خوێندن

ابی ئومامه‌ ده‌فه‌رموێت گوێم لێ بوو له‌ پێغه‌مبه‌ری خوا درودی خوای له‌سه‌ر بێت ده‌یفه‌رموو [اقْرَؤوا الْقُرْآنَ فَإِنَّهُ يَأْتِي يَوْم الْقِيَامَةِ شَفِيعاً لأَصْحَابِهِ ] رواه مسلم واتا : قورئان بخوێنن ڕۆژی قیامه‌ت قوڕئان دێت داوای لێ خۆش بوون له‌خوا داوا ده‌کات بۆ خاوه‌نه‌کی .
وه‌هه‌روه‌ها ابن مه‌سعود ده‌فه‌رموێت گوێم لێ بوو له‌ پێغه‌مبه‌ری خوا درودی خوای له‌سه‌ر بێت ده‌یفه‌رموو [مَنْ قَرَأَ حَرْفَاً مِنْ كِتَابِ الله فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لاَ أَقُولُ آلم حَرْفٌ وَلَكِنْ أَلِفٌ حَرْف ولامٌ حَرْفٌ وَميمٌ حَرْفٌ ] رواه الترمذى حديث صحيح واتا : هه‌رکه‌سێک پیتێک بخوێنێت له‌ قورئانی پیرۆزا چاکه‌یه‌کی ده‌ست ده‌که‌وێت ،وه‌ چاکه‌ به‌ ده‌ چاکه‌یه‌ وه‌ من ناڵێم [ الم ] پیتێکه‌ به‌ڵکو ئه‌لف پیتێکه‌ وه‌ لام پیتێکه‌ وه‌ میم پیتێک .
ئینجا هه‌وڵی خه‌تم کردنی قورئان بده‌ به‌و ده‌ ڕۆژه‌ چونکه‌ خێری زۆر زیاتره‌ له‌ ڕۆژانی تر ئینجا ئه‌گه‌ر قورئانی پیرۆز له‌ 340740 پیت پێك هاتبێت هه‌ر چاکه‌یه‌ک به‌ ده‌ چاکه‌یه‌ که‌واته‌ 340740 جاران 10 =3407400‏ سێ ملیۆن و چوارسه‌دووحه‌وت هه‌زاروو حه‌وسه‌ت و چڵ خێرت ده‌ست ده‌که‌وێت له‌ خه‌تم کردنی یه‌ک جار قورئانی پیرۆز ئه‌مه‌ له‌ ڕۆژانی ئاساییه‌ به‌ڵام له‌م ده‌ڕۆژه‌ هه‌رخوا بۆخۆی ده‌زانێت چه‌ند پاداشت ده‌داته‌وه‌، وه‌ ئه‌گه‌ر قورئان نازانیت بخوێنیت ئه‌وا گوێی لێ بگره‌ چونکه‌ گوێ گر وه‌ک ئه‌و که‌سه‌یه‌ که‌ ده‌خوێنێت.
هه‌ر به‌و ده‌خاڵه‌ کۆتایی به‌ بابه‌ت دێنم ئه‌گه‌رنا خێرو خێراتی زۆر هه‌یه‌ موسڵمان له‌ ده‌ستی نه‌دات و ڕه‌زامه‌ندی خوای پێ وه‌ده‌ست بێنێت له‌م ده‌ ڕۆژه‌دا به‌ تایبه‌تی و ڕۆژانی تریش وه‌ک چاکه‌ کردن له‌گه‌ڵ دایک و باوک و ڕاست گۆیی و به‌جێگه‌یاندنی سیله‌ی ره‌حم و ئاشکردنه‌وه‌ی خه‌ڵک و بانگه‌وازی چاکه و ئاگادار کردنه‌وه‌ی خه‌ڵک له‌ خه‌راپه‌ و له‌ ئه‌ستۆ گرتنی به‌خێوکردنی هه‌تیو و یارمه‌تی دانی خه‌ڵک و سه‌ردانی نه‌خۆش و زۆر سه‌ڵاوه‌تدان له‌ پێغه‌مبه‌ر درودی خوای له‌سه‌ر بێت و ئازار نه‌دانی موسوڵمانان و گه‌یا‌ندنی ئه‌مانه‌ت و بوونی وه‌فا له‌ په‌یماندا و خوێندنی سوڕه‌تی الکهف له‌ ڕۆژی هه‌ینی دا و ئه‌نجامدانی نوێژی جه‌ژن له‌ مزگه‌وتدا و کردنی زیکری خوا له‌ دوای ته‌واو بوونی نوێژه‌کان و بانگه‌وازی کردن بۆ ئاینی پیرۆزی ئیسلام وه‌ هیتریش .
له‌ کۆتایدا له‌ دوعای خێر بێ به‌شمان مه‌که‌ن باشترین دوعاش دوعای عیلمه‌ خوا له‌و ئاینه‌ پیرۆزه‌ شاره‌زامان بکات و[ اخلاص ]مان له‌ گوفتار و ڕه‌فتاردا پێ ببه‌خشێت ئامین .

[ وصلى الله على نبينا محمد وعلى آله وصحبه وسلم .

زۆرترین بینراو