ئامانج له ‌باسكردنی نیشانه‌‌كانی قیامه‌ت و تێكچوونی دونیا

هەواڵی / 3/8/2017 408 جار بینراوە

ئامانج له ‌باسكردنی نیشانه‌‌كانی قیامه‌ت و تێكچوونی دونیا

شه‌ن پرێس :
مامۆستا ناظم عبدالله - سه‌ركرده‌ و بانگخوازی ئیسلامی

هه‌ندێك جار و له‌ هه‌ندێك له ‌ناوه‌نده‌ ئیسلامییه‌كانه‌وه‌، ئه‌وه‌ ده‌درێت به ‌گوێی مسوڵماناندا، ژمارەیەک نیشانه‌ ده‌ركه‌وتوون كه‌ پێغه‌مبه‌ر (صلی الله‌ علیه‌ وسلم) پێشتر ئاماژه‌ی پێكردوون‌ بەوەى کە ‌ده‌ركه‌وتنی ئه‌و نیشانانه‌، هێمای نزیكبوونه‌وه‌ی كۆتایی ‌ژیانی دونیایە. ئێمه‌ باوه‌ڕمان به‌وه‌ هه‌یه‌ هه‌موو ئه‌و هه‌واڵانه‌ی کە پێغه‌مبه‌ر (صلی الله‌ علیه‌ وسلم) گه‌یاندوونی، هه‌ندێكیان ڕوویانداوه،‌ ئه‌وانه‌شیان كه ‌ماون، به‌ دڵنیاییه‌وه‌ ڕووده‌ده‌ن. ئه‌و هه‌واڵانه‌ش زیاتر دوو مه‌به‌ستیان لێده‌خوێنرێته‌وه‌، مه‌به‌ستی یه‌كه‌م پشتڕاستكردنه‌وه‌ی پێغه‌مبه‌رایه‌تییه‌. مه‌به‌ستی دووه‌میش به‌رچاوڕۆشنكردنی مسوڵمانانه‌ بۆ خۆئاماده‌كردنیان بۆ كار و خزمه‌تى زیاتر له‌ دونیادا، بە مەبەستى ده‌سخستنی زۆرترین پله‌ و پاداشت له‌ قیامه‌تدا.

‌له‌ فه‌رمووده‌كانی پێغه‌مبه‌ریشدا (صلی الله‌ علیه‌ وسلم) ئه‌وه‌ ئه‌خوێنرێته‌وه‌، هه‌روه‌كو ‌بوخاری و موسلیم ئه‌گێڕنه‌وه‌ كه ‌جارێك پیاوێك هات بۆ لای پێغه‌مبه‌ر (صلی الله‌ علیه‌ وسلم) و پرسیاری كرد كه‌ی قیامه‌ت دێت؟ پێغه‌مبه‌ر به‌ پێچه‌وانه‌ی پرسیاره‌كه‌ی وەڵامی دایه‌وه‌ و فه‌رمووی (چیت بۆ ئاماده‌ كردووه‌؟). یان بوخاري له‌ ئه‌نه‌سی كوڕی مالیكه‌وه‌ ئه‌گێڕێته‌وه‌ كه‌ پێغه‌مبه‌ر ( صلى الله عليه وآله وسلم) فه‌رموویه‌تی: "إن قامت الساعة وفي يد أحدكم فسيلة فإن استطاع أن لا تقوم حتى يغرسها فليغرسها)، واته‌ ئه‌گه‌ر قیامه‌ت هه‌ستا و یه‌كێك له‌ ئێوه‌ چڵه‌دارێكی له‌ ده‌ستدا بوو، ئه‌گه‌ر ده‌یتوانی پێش ڕوودانی قیامه‌ت بیڕوێنێت، ئەوا با بیڕوێنێت. به ‌ڕاستی ده‌بێ وریا بین لەوەى شێوازی باسكردنی نیشانه‌كانی قیامه‌ت ئه‌وه‌ی لێ نه‌خوێنرێته‌وه‌ كه‌ مسوڵمانان له‌ ژیان بێزارن و ژیان بووه‌ به‌ بارێك به‌سه‌ریانه‌وه‌ و خواخوایانه‌ ڕزگاریان ببێت، یان به‌ بیانووی له‌ناوچوونی ژیان ئاماژه‌یه‌ك بێت بۆ نائومێدی و كۆششنه‌كردن.
له ‌ڕاستیدا بڵاوكردنه‌وه‌ی ئه‌وجۆره‌ ده‌قانه‌ به ‌ڕه‌هایی و بێ ڕوونكردنه‌وه‌ی پێویست، ئامانج ناپێكێت و شوێنه‌واری نه‌رێنی له‌سه‌ر هه‌ست و هۆشی مسوڵمانان جێده‌هێڵێت، چونكه‌ ئه‌م ژیانه‌ وا به ‌ئاسانی تێك ناچێت و هیچ كه‌سێكیش به ‌گۆتره‌ ناتوانێت ماوه‌ی ژیان دیاری بكات. پێغه‌مبه‌ر(صلی الله‌ علیه‌ وسلم) ده‌فه‌رموێت: (بعثت أنا والساعة كهاتین وأشار بإصبعیه‌ فیمدهما)، واته‌ نێوان پێغه‌مبه‌رایه‌تیی من و قیامه‌ت وه‌كو ئه‌و دوو په‌نجه‌یه‌ وایه‌، هه‌ردوو په‌نجه‌ی به‌ درێژیی ڕاگرت. قورتوبى ده‌ڵێت: مه‌به‌ستی پێغه‌مبه‌ر ئه‌وه‌یه‌ كه‌ پێمان بڵێت چۆن ئه‌و دوو په‌نجه‌یه‌ شتێكیان له ‌نێواندا نییه‌، هاتنی من و قیامه‌تیش پێغه‌مبه‌رێكی تری له‌ نێواندا نییه‌، وه‌كو خوای گه‌وره‌ ئاماژه‌ی پێده‌كات و ده‌فه‌رموێت: (ما كَانَ مُحَمَّدٌ أَبَا أَحَدٍ مِّن رِّجَالِكُمْ وَلَكِن رَّسُولَ اللَّهِ وَخَاتَمَ النَّبِيِّينَ وَكَانَ اللَّهُ بِكُلِّ شَيْءٍ عَلِيمًا) (الأحزاب: 40).

شارستانیه‌تی ئیسلامیی زیاتر له‌ سه‌د ساڵه‌ له‌ گه‌شه‌كردن و پێشڕه‌وی كه‌وتووه‌، زانایان و بیرمه‌ندان و شوێنكه‌وتوانی ڕێڕه‌وی ئیسلامیی به ‌گشتی، له‌ هه‌وڵ و كۆشش دان بۆ گێڕانه‌وه‌ی ئه‌و شارستانیه‌ته‌، هه‌رچه‌ند میكانیزمی گێڕانه‌وه‌ی شارستانیه‌تی ئیسلامیی له‌ ئاستی پێویستدا نییه‌، له‌ كاتێكدا ئه‌یه‌وێت هه‌نگاوێك به‌ره‌و پێشه‌وه‌ بنێت، به ‌هه‌ڵه‌تێگه‌یشتن و كه‌مئه‌زموونیی جارێكی تر چه‌ند هه‌نگاوێك ده‌هێنرێته‌وه‌ به‌ره‌و دواوه‌. لێره‌دا پرسیاره‌كه‌ ئه‌وه‌یه‌ له‌ كاتی هه‌ستانه‌وه‌دا ده‌بێت گه‌شبینی و ئومێدبه‌خشین بڵاوبكرێته‌وه‌، یان ده‌نگوباسی كۆتاهاتنی دونیا و چاوه‌ڕوانیی له‌ناوچوون؟!
‌پێویسته‌ ئه‌و فه‌رموودانه‌ له‌ جێگه‌ی خۆیاندا به‌كاربهێنرێن، ئه‌ویش بریتییه ‌له‌وه‌ی تا ئه‌و كاته‌ی هزری ئیسلامیی و شارستانیه‌تی ئیسلامیی ڕێڕه‌وی سروشتیی خۆیان ئه‌گرنه‌ به‌ر و، مسوڵمانان له‌سه‌ر پێی خۆیان ئه‌وه‌ستن، شان به ‌شانى ئه‌و فه‌رمووادنه‌ی باس له‌ نیشانه‌ بچووكه‌كانی قیامه‌ت ده‌كه‌ن، ئه‌و فه‌رموودانه‌ش بدرێن به‌ گوێی مسوڵماناندا كه‌ باس له‌ هه‌ستانه‌وه‌ و پاداشته‌كانی ئاوه‌دانكردنه‌وه‌ی سه‌رزه‌وی ده‌كه‌ن، بۆ ئه‌وه‌ی شه‌و و ڕۆژ بخه‌نه سه‌ر یه‌ك بۆ كاركردن و بنیاتنان، ‌تاوه‌كو پێش ڕوودانی قیامه‌ت هه‌ركه‌س له‌ ژیانی خۆیدا ته‌مبه‌ڵی وه‌لا بنێت و خزمه‌تێكی زیاتر پێشكه‌ش بكات، به‌ خوو ڕه‌وشته‌ جوانه‌كانی كاریگه‌ریی زیاتر جێ بهێڵێت بۆ وه‌رگرتنی ئیسلام و پابه‌ندیی زیاتری خه‌ڵكانی تر به‌ ئیسلامه‌وه‌.

یان ئه‌گه‌ر مه‌به‌ست له‌ باسكرنی ئه‌و فه‌رموودانه، ئه‌وه‌یه‌ ئه‌و گۆڕانكارییه‌ سروشتییانه‌ ده‌بنه‌ هۆی ژیانه‌وه‌ی كه‌نداوی عه‌ره‌بی و تێكچوونی به‌شێك له‌ شارستانییەته‌‌كانی دونیا، وه‌كو ئیمامی موسلیم ده‌گێڕێته‌وه‌، كه‌ پێغه‌مبه‌ر (صلى الله عليه وسلم ) فه‌رموویه‌تی: (لن تقوم الساعة حتى تعود أرض العرب مروجًا وأنهارً)، واته‌ قیامه‌ت هه‌ڵناسێت تاوه‌كو كه‌نداوی عه‌رەب نه‌بێته‌وه‌ به‌ سه‌وزایی و ڕووبار، دیسانه‌وه‌ جیهانی ئیسلامیی به‌و حاڵه‌ هه‌ڵناسێته‌وه‌، چونكه‌ پێغه‌مبه‌ر (صلی الله‌ علیه‌ وسلم) باسی بوژانه‌وه‌ی سروشتیی كه‌نداوی عه‌ره‌ب ده‌كات، باس له‌ بوژانه‌وه‌ی ئاینی و شارستانی و چۆنیه‌تیی حوكمڕانی ناكات. خۆ ئه‌گه‌ر له‌ فه‌رمووده‌ی تردا باس له‌ گه‌ڕانه‌وه‌ی حوكمی ئیسلامی بكات، دیسانه‌وه‌ ئه‌ویش به‌ستراوه‌ته‌وه‌ به‌ كۆشش و هه‌وڵی مسوڵمانانه‌وه‌، نه‌ك به‌ موعجیزه‌، له‌به‌ر ئه‌وه‌ی هه‌موو هه‌ستانه‌وه‌یه‌ك ده‌بێ به‌ زانست و لێبڕان سه‌ركردایه‌تی بكرێت. خۆ داهات و ژێرخانی یه‌ده‌كی سروشتیی نه‌وت و غاز، بە نزیكه‌ی 70%ى داهاتی جیهان له‌ جیهانی‌ ئیسلامییدایه‌، بەڵام نه‌ك خۆمان هه‌ر ناتوانین به‌رهه‌می بهێنین، ئه‌وه‌شى به‌ ته‌كنۆلۆژیای وڵاتانی ڕۆژئاوا به‌رهه‌م ده‌هێنرێت، ناتوانین به ‌ڕێكوپێكی سوودی لێببینین. ‌ئه‌گه‌ریش سه‌دان ساڵی تر هه‌وڵی پێشكه‌وتن نه‌ده‌ین و، له‌ ڕووی زانست و ته‌كنۆلۆژیا و سیستمی حوكمڕانییه‌وه‌ نه‌كه‌وینه‌ ‌سه‌رووی وڵاتانی ڕۆژئاواوه‌، ئه‌گه‌ر وڵاتانی عه‌ره‌بی جگه‌ له‌ كانی نه‌وت و غاز، خوای گه‌وره ڕووبار و ئۆقیانووسه‌كانی ئه‌وروپاشمان بۆ بهێنێت، هه‌ر هه‌مووی ببێت به ‌ڕووبار و كانیاو، حاڵمان له‌ ئێستا باشتر نابێت، ئه‌ویش به‌ یه‌ك به‌ڵگه‌ی ڕوون و ئاشكرا، کە خوای گه‌وره‌ ده‌فه‌رموێت: (وَأَنْ لَيْسَ لِلْإِنْسَانِ إِلَّا مَا سَعَى) (النجم: 39). يان دەفەرموێت: (كُلًّا نُمِدُّ هَٰؤُلَاءِ وَهَٰؤُلَاءِ مِنْ عَطَاءِ رَبِّكَ ۚ وَمَا كَانَ عَطَاءُ رَبِّكَ مَحْظُورًا) (الاسراء: 20)، واته‌ به‌خشنده‌یی ئێمه ئیماندار و بێئیمان وه‌ك یه‌ك ده‌گرێته‌وه‌ و به‌خشنده‌یی ئێمه‌ ڕێلێگیراو نییه‌.
 


زۆرترین بینراو